Մենք հարցեր չունենք՝ ուզում եք դուրս եկեք ՀԱՊԿ-ից, հրավիրեք Ֆրանսիային ու ԱՄՆ-ին թող լուծեն խնդիրը․ Տարասովը Հայաստանի իշխանություններին ահա թե ի՞նչ է ասում

Ռուսաստանի և Ադրբեջանի նախագահներն ուրբաթ օրը բանակցություններ կանցկացնեն՝ քննարկելու իրավիճակը Հարավային Կովկասում, լրագրողներին հայտնել է Կրեմլի խոսնակ Դմիտրի Պեսկովը։



«Այս շաբաթ մենք հուսով ենք, որ տեսչական խումբը, այնուամենայնիվ կժամանի սահման, որպեսզի պատրաստի իր զեկույցը ՀԱՊԿ երկրների ղեկավարների համար։ Իսկ վաղը տեղի կունենա հանդիպում նախագահ Ալիևի հետ »,- Պեսկովի խոսքերն են մեջբերում ռուսաստանյան լրատվամիջոցները։



Նախագահներ Վլադիմիր Պուտինը և Իլհամ Ալիևը մասնակցում են ուզբեկական Սամարղանդ քաղաքում այսօր մեկնարկող Շանհայան համագործակցության կազմակերպության գագաթնաժողովին։

Երեկ կառավարությունից փոխանցել են, որ երկրում ստեղծված իրավիճակով պայմանավորված վարչապետ Նիկոլ Փաշինյանը չի մասնակցի վաղը այդ գագաթնաժողովին։

Ռուսաստանցի քաղաքագետ Ստանիսլավ Տարասովը գտնում է, որ հայ-ադրբեջանական սահմանին այս օրերին տեղի ունեցողը տարօրինակ է թվում․ «Օրերս Բրյուսելում տեղի էր ունեցել Փաշինյանի ու Ալիևի հանդիպումը, որտեղ քննարկում էի գնացել խաղաղության պայամանագրի նախապատրաստման շուրջ։ Հետագայում Մոսկվայում փոխվարչապետերի մակարդակով հանդիպում տեղի ունեցավ՝ սահմանների դեմարկացիայի վերաբերյալ։ Այսպիսի երկու գործընթաց էր տեղի ունեցել, որոնք բարդ էր, շատ տարաձայնություններ են առաջացնում, բայց այնուամենայնիվ դա խաղաղ գործընթաց էր և պետք է, որ բերեր լարվածոՒթյան թուլացմանը, իսկ քաղաքական կամքի առկայության դեպքում՝ որոշակի համաձայնությունների ձեռքբերմանը»,-«Առաջին լրատվական»-ի հետ զրույցում ասաց նա։

Ըստ Տարասովի՝ այս ֆոնին ռազմական բախումները մի շարք հարցեր են առաջացնում․ «Ես կարող եմ հետևություն անել, որ կողմերից մեկը, հնարավոր է նաև երկուսը՝ հետաքրքրված են, որ այդ գործընթացները չեղարկվեն։ Թող դրանք լինեին Բրյուսելի հովանու ներքո, այդուհանդերձ դրանք խաղաղ գործընթացներ էին, որոնք չեղարկվում են։ Ինչպես հայտնի է՝ Հայաստանը դիմել է ՄԱԿ ԱԽ, ՀԱՊԿ, բայց հարցն այն է, որ սահմանների դելիմիտացիայի բացակայության դեպքում շատ դժվար կլինի որոշում կայացնել։ Պատահական չէ, որ ՀԱՊԿ-ը որոշեց առաքելություն ուղարկել՝ տեղում իրավիճակը պարզաբանելու համար»,-ասաց նա։

Մեր զրուցակիցը գտնում է, որ Սամարղանդ քաղաքում անցկացվող Շանհայան համագործակցության կազմակերպության գագաթնաժողովին Ռուսաստանը կփորձի իրավիճակի շուրջ պարզաբանումներ ստանալ՝ Էրդողանից ու Ալիևից․ «Փաշինյանը հրաժարվեց գնալ։ Կարծում եմ, որ մյուս երկուսի հետ կքննարկվի էսկալացիան և կարվի հնարավոր ամեն բան, որ դրանք չվերաճեն լայնամասշտաբ պատերազմական գործողությունների։ Ադրբեջանն իր խնդիրը լուծել է, շրջանները վերադարձրել է և հիմա պետք է այդ ամենն ամրագրի իրավական տեսքով։ Միգուցե սակայն Բրյուսելում եղել են որոշակի դժվարություններ, անհամաձայնություններ և Ալիևը փորձում է ուժի ճանապարհով դրանք լուծել։ Բայց ամեն դեպքում գտնում եմ, որ կողմերը հետաքրքրված չեն լայնամաշստաբ գործողություններով որովհետև դա տեղի է ունենալու Հայաստանի տարածքում, իսկ այստեղ ՀԱՊԿ-ն։ Եթե Արցախում լինի՝ ռուս խաղաղապահներ են, ինչը նորից ռեալ չէ։ Պատահական չէ, որ Էրդողանին հրավիրել են Սամարղանդ, նա հիմա Մոսկվայի հետ կոնտակտներ է փնտրում, քանի որ խնդիրներ ունի Իրաքյան Քուրդիստանի հետ, Սիրիայում, կա նաև ուկրաինական ճգնաժամը»։

Նրա կարծիքով՝ որոշ ուժեր երկրների ներսում փորձում են ապակայունացնել իրավիճակն ու այդպիսով ինչ-ոչ խնդիրներ լուծել․ «Ես կասկածում եմ, որ այս ամենի արդյունքում Հայաստանում տաքացվում են հակառուսական տրամադրությունները, թե տեսեք՝ Մոսկվան մեզ քցեց, ՀԱՊԿ-ը մեզ չօգնեց, Փաշինյանը չգնաց Սամարղանդ հենց այդ պատճառով։ Դա կնպաստի հակառուսական տրամադրությունների աճին, ինչը շատ անցանկալի է։ Իրավիճակը պահանջում է մանրակրկիտ վերլուծություն, ամեն ինչ այնքան միանշանակ չէ, որքան դա փորձում են ներկայացնել պաշտոնական Երևանը, Պաշտոնական Բաքուն»։

Մեր այն դիտարկմանը, որ Հայաստանում ակնկալում են, որ Ռուսաստանն էլ Ֆրանսիայի ու ԱՄՆ-ի նման մատնանշի ագրեսսոր պետությանը՝ լղոզված հայտարարություններ անելու փոխարեն, Տարասովն արձագանքեց․ «Մենք Ֆրանսիայի ու ԱՄՆ-ի դատողություններին չենք վստահում, նրանք մեր գործընկերները չեն։ Եթե ԱՄՆ-ն ու Ֆրանսիան ի վիճակի են ինքնուրույն կրագավորել իրավիճակը՝ թող կարգավորեն, Մոսկվան դրան չի խանգարում։ Մենք հարցեր չունենք՝ ուզում եք դուրս եկեք ՀԱՊԿ-ից։ Եթե ուզում եք հրավիրել Ֆրանսիային ու ԱՄՆ-ին, ապա ի սեր Աստծո արեք դա, մենք հարցեր չունենք»։

https://www.1in.am/3164763.html