Ըստ ադրբեջանական լրատվամիջոցների, Բաքուն Երևանին է փոխանցել խաղաղության պայմանագրի ընդլայնված տարրեր: Այդ մասին տեղի լրատվամիջոցներին ասել է Ադրբեջանի արտգործնախարար Ջեյհուն Բայրամովը, ասելով, որ Երևանը ժամանակ է վերցրել դրանց ծանոթանալու համար: Ինչ «ընդլայնված տարրերի» մասին է խոսքը, Ջեյհուն Բայրամովը չի մանրամասնել: Ըստ նրա, խոսքը Ադրբեջանի ներկայացրած հայտնի սկզբունքները լրացնող տարրերի մասին է: Պետք է ենթադրել, որ «ընդլայնված տարրերը» վերաբերում են Արցախին:
Համենայն դեպս, տրամաբանությունը հուշում է, որ «ընդլայնված տարրերի» անհրաժեշտություն կարող էր առաջանալ միայն այդ հարցի առումով, քանի որ Բաքվի ներկայացրած կետերի վերաբերյալ Երևանի դիրքորոշումը եղել է այն, որ դրանք ընդհանուր առմամբ ընդունելի են, սակայն թերի՝ հենց Արցախի ժողովրդի անվտանգոության և իրավունքների հարցերի առումով:
Երևանը նշել է, որ այդ հինգ կետերը ամբողջապես չեն հասցեագրում խնդիրները, մասնավորապես չեն ներառում Արցախի հանրության անվտանգության և իրավունքների շրջանակը: Ընդ որում, Երևանը պարբերաբար նշել է, որ խոսքը իրավունքների ամբողջ սպեկտրի մասին է: Այդպիսով, տրամաբանությունը հուշում է, որ «ընդլլայնված տարրերը» կարող են վերաբերել հասցեականության ամբողջացմանը, այլ կերպ ասած այն դիտարկմանը, որ արել է Երևանը: Իհարկե, քանի դեռ պարզ չեն մանրամասները, բարդ է միարժեք ասել, թե տարրերը հենց դրան էլ վերաբերում են: Կարող ենք միայն ենթադրել, ելնելով նաև այն հայտարարություններից, որ Երևանն անում է Ստեփանակերտ-Բաքու շփումների առնչությամբ: Հայաստանը այդ օրակարգի մասին խոսում է հոկտեմբերի 2-ին Ժնևում տեղի ունեցած Միրզոյան-Բայրամով հանդիպումից հետո:
Թեմայի վերաբերյալ շեշտադրումը կրկնվել է նաև Պրահայի քառակողմ Վեհաժողովից հետո: Հատկանշական է, որ այդ առնչությամբ Ադրբեջանից չկա կտրուկ հակադարձում և մերժում: Սա նշանակում է, որ, կամ թեման քննարկվում է Բաքվի հայտնի մոտեցման շրջանակում՝ Արցախի հանրության ինտեգրացիա ադրբեջանական հասարակական համակարգ, կամ Ադրբեջանը գնացել է փոխզիջման և քննարկում է Արցախի հանրության անվտանգության և իրավունքների ամբողջ սպեկտրը, այդ թվում և ինքնորոշման իրավունքի: Սա էլ իհարկե լոկ ենթադրության դաշտից, քանի դեռ չկան «ընդլայնված տարրերի» վերաբերյալ հավելյալ մանրամասներ:
Միարժեք է սակայն այն, որ Ստեփանակերտ-Բաքու շփումների թեմայի առաջխաղացումը կարող է հեռանկար ունենալ միայն երկրորդ տարբերակի պարագայում, քանի որ առաջին տարբերակի հեռանկարը ավելի շոււտ կլինի փակուղին և նոր լարվածությունը: Ըստ այդմ, այդ հարցադրումը նաև գործընթացի միջնորդների առաջ է, թե ու՞ր են տանում նրանք իրավիճակը իրենց միջնորդական գործողություններով: Թերևս ուշադրության է արժանի նաև հանգամանքը, որ Բայրամովը Երևանին «ընդլայնված տարրեր» փոխանցելու մասին է հայտարարում Աստանա մեկնելուց առաջ, որտեղ ինչպես հայտնի է պլանավորված է Միրզոյան-Բայրամով հանդիպում՝ ՌԴ արտգործնախարարի միջնորդությամբ: